“Reuters” raporton se njëri prej tyre u soll para gjykatës drejtpërdrejtë nga spitali me një karrocë dhe qëndroi me sy të mbyllur përgjatë gjithë seancës. Sipas agjencisë së lajmeve, atij dukej se i mungonte njëri sy, ndërsa një tjetri veshi.
Katër autorët e dyshuar të sulmit terrorist të regjistruar të premten e kaluar në Moskë, kanë dalë ditën e djeshme para gjykatës, ku janë shfaqur me fasho në fytyrë dhe shenja të dukshme rrahjeje.
“Reuters” raporton se njëri prej tyre u soll para gjykatës drejtpërdrejtë nga spitali me një karrocë dhe qëndroi me sy të mbyllur përgjatë gjithë seancës. Sipas agjencisë së lajmeve, atij dukej se i mungonte njëri sy, ndërsa një tjetri veshi.
Më herët në media qarkulluan video të marrjes brutale në pyetje nga forcat e sigurisë dhe raportimet sugjeruan se të paktën njëri prej tyre u ishte nënshtruar shokut elektrik. Katër të arrestuarit janë identifikuar si Dalerdzhon Mirzoyev, Saidakrami Murodali, Shamsidin Fariduni dhe Muhammadsobir Fayzov, të gjithë shtetas të Taxhikistanit.
Siç thuhet, tre prej tyre i pranuan fajin për të gjitha akuzat, ndërsa të katërt do të mbahen në paraburgim deri në 22 maj. Një grupi i Shtetit Islamik, i ashtuquajtur Isis-K, ka marrë përsipër autorësinë e sulmit të së premtes në sallën e koncerteve Crocus, duke postuar edhe video për ta vërtetur këtë. Por, autoritetet në Rusi pretendojnë përfshirjen e Kievit, dhe kanë sugjeruar pa ofruar prova se Ukraina kishte përgatitur një dritare kalimi në kufirin pranë rajonit të Bryansk, për të mundësuar arratisjen e tyre.
Akuzat u cilësuan absurde nga Presidenti Volodymyr Zelenski: “Është e qartë se Putini dhe mashtruesit e tjerë po përpiqen të gjejnë dikë tjetër për t’ia faturuar fajin. Metodat janë gjithmonë të njëjta. E kemi parë edhe më herët: godina të shkatërruar, të shtëna dhe shpërthime. Gjihmonë kërkojnë të fajësojnë dikë tjetër”.
4 personat e armatosur mësynë sallën në periferinë veriore të Moskës, duke qëlluar pa dallim ndaj 6000 njerëzve që po merrnin pjesë në një koncert roku. Agresorët i vunë më pas zjarrin ambjentit, duke shkaktuar shembjen e çatisë së godinës.
Sipas autoriteteve ruse, të paktën 137 persona mbetën të vrarë në sulm dhe mbi 100 të plagosur.
