Është përshkallëzuar protesta e opozitës, teksa qytetarët kanë hedhur bomba molotov drejt godinës së Bashkisë së Tiranës.
Protestuesit kanë hedhur flakadanë dhe molotov, duke shkaktuar një zjarr të madh në hyrje të bashkisë.
Tymi i zi dhe zjarri mbuluan derën e institucionit, ndërsa forcat e policisë kanë shuar flakët.
Përveç molotivit dhe flakadanëve, protestuesit hodhën edhe bojë të zezë dhe mollë drejt Bashkisë.
Me megafon Tedi Blushi, këshilltar bashkiak i Partisë së Lirisë të cilin Meta e ka propozuar për ta bërë dhe sekretar të përgjithshëm të kësaj partie sulmoi sërish SPAK. Duke akuzuar prokurorinë e posaçme se po bashkëpunon me Erion Velinë i kërkoi këtij të fundit të largohet.
“Nga ky shesh po të paralajmërojmë se nëse vijon të mbrohesh me SPAK-un e kapur me polici që e ke shndërruar në badigardë personal tënd ta dish mirë do të hyjmë në zyrë ne e do të të arrestojmë ty dhe më pas Edi Ramën”, tha Blushi.
Opozita, por edhe qytetarë po protestojnë që prej orës 11:00 para bashkisë, pas arrestimeve të disa ish-zyrtarëve të këtij institucioni për abuzim me detyrën për dosjen ‘5D’. Ata kërkojnë dorëheqjen e kryebashkiakut Veliaj.
Të pranishëm ishin edhe deputetë të opozitës, ndërsa Belind Këlliçi theksoi se aksioni do vijojë derisa Veliaj të largohet nga posti.
Në pankartat që mbanin në duar shkruhej: Mjaft! Jep dorëheqjen!
Kjo është protesta e tretë që organizon shoqëria civile me mbështetjen e PD, pas arrestimit të disa ish-zyrtarëve të bashkisë më të madhe në vend.
