Çollaku u shpreh se SPAK ka më shumë informacione për gjyqtarë e prokurorë që janë në sistem dhe që janë pjesë e hetimeve.
Në këto kushte ai tha se do të jetë shumë e vështirë që Prokuroria e Posaçme të veprojë pasi bëhet fjalë dhe për ortakët e tyre.
“Ka diçka që nuk e kuptoj shumë mirë nga SPAK. Ata kanë dijeni mijëra herë më mirë se ne se gjyqtarë, prokurorë, që janë në sistem, që janë pjesë e këtij investigimi, atyre do ju shkojnë dosjet për vendimmarrje më vonë, atëherë si do t’i dënojnë këta ortakët e tyre? A duhet të fillojmë njëherë pastrimin e brendshëm, që kur të na vijë një çështje për të marrë vendim mos të kemi siklete,”.
Zbërthimi i aplikacionit SKY ECC ka çuar në goditjen e një tjetër grupi kriminal duke vënë në pranga ish-zëvendës drejtorin i Policisë së Tiranës, Erzen Breçani; shefin e Krimeve në Komisariatin numër 6, Dedan Gjoni dhe Bujar Germizi emër i njohur i botës së krimit në Kukësi.
Gjashtë persona janë shpallur në kërkim: Eralbi Breçani, djali i Erzen Breçanit, biznesmeni Ervin Mata, vëllai i gruas së Eralbi Breçanit; Albert Prenga; Ismail Zeneli; Bajram Grabova e Artan Sulejmani.
Ndërkohë është caktuar masë sigurie detyrim me paraqitje për Jonida Babameto me detyrë oficere e Drejtorisë së Kufirit dhe Emigracionit.
