Shumë aleatë e shohin ngërçin si një pararojë se politika e SHBA ndaj Kievit do të ndryshonte nën një presidencë të Trump.
NATO po harton plane për të siguruar një paketë ndihme ushtarake pesëvjeçare deri në 100 miliardë dollarë, në një përpjekje për të mbrojtur Ukrainën nga “erërat e ndryshimit politik” që mund të sjellë një presidencë të dytë të Trump.
I ashtuquajturi propozimi i Misionit për Ukrainën, i cili do të diskutohet nga ministrat e jashtëm të NATO-s të mërkurën, është paraqitur nga Sekretari i Përgjithshëm, i NATO-s, Jens Stoltenberg.
Sipas pesë diplomatëve të aleancës të informuar mbi planin, ai do të bashkërendonte rreth 100 miliardë dollarë në mbështetje të kryer nga 32 anëtarët e aleancës ushtarake.
Stoltenberg e ka paraqitur propozimin si një mjet “për të mbrojtur mekanizmin kundër erërave të ndryshimeve politike”, sipas njerëzve të informuar mbi komentet e tij.
Nëse miratohet, do t’i jepte gjithashtu aleancës kontrollin e grupit mbështetës të armëve Ramstein të udhëhequr nga SHBA dhe do ta lejonte atë të menaxhonte furnizimin me armë vdekjeprurëse në Ukrainë për herë të parë që nga pushtimi i plotë i Rusisë në 2022.
Sekretari i përgjithshëm norvegjez, i cili do të largohet nga detyra e tij këtë vjeshtë, synon të arrijë marrëveshje përpara samitit të liderëve të NATO-s në Uashington në korrik.
“Kjo do të jetë kapërcim i Rubikonit. NATO do të ketë një rol në bashkërendimin e mbështetjes vdekjeprurëse për Ukrainën. Unë shoh konsensus që po shfaqet dhe mendoj se do të jetë aty deri në momentin që të hipim në aeroplan për në Uashington.”, tha një nga diplomatët, raporton Financial Times.
Propozimi i misionit vjen ndërsa administrata Biden përpiqet të marrë miratimin nga Kongresi për një paketë dypalëshe të mbështetjes ushtarake të Ukrainës, prej 60 miliardë dollarësh, kundër të cilës kryesuesi republikan Donald Trump ka folur hapur, përpara zgjedhjeve presidenciale në nëntor.
Shumë aleatë e shohin ngërçin si një pararojë se politika e SHBA ndaj Kievit do të ndryshonte nën një presidencë të Trump.
Ai është hartuar ndërsa aleatët e NATO-s shqetësohen për gjendjen e konfliktit në Ukrainë, ku Rusia ka rifituar iniciativën në terren, duke ia dalë mbanë dhe ia kalon forcat ukrainase.
Pjesa e SHBA-së e 100 miliardë dollarëve do të ishte dukshëm më e vogël se paketa dypalëshe e ndihmës që po mbahet, thanë diplomatët. Debatet janë duke vazhduar rreth strukturës së financimit, me disa që shtyjnë për të njëjtën ndarje të përdorur për financimin e buxhetit të përbashkët të NATO-s – sipas të cilit SHBA-ja do të duhet të sigurojë pak më shumë se 16 miliardë dollarë.
“100 miliardë dollarë për pesë vitet e ardhshme për të mbështetur forcën ukrainase të së ardhmes”, tha diplomati, i cili tha se koeficientët e përbashkët të buxhetit të NATO-s mund të përdoren për të llogaritur pjesët individuale të shpenzimeve totale. “Ai zgjidh një problem të ndarjes së barrës.”
Ai parashikohet si një mjet për të bllokuar financimin afatgjatë përpara zgjedhjes së mundshme të Trump dhe për t’i dhënë Kievit një rezultat konkret nga samiti, në vend të përparimit drejt anëtarësimit të dëshiruar në NATO, gjë që shihet si e pamundur nga shumë anëtarë të aleancës.
“Ministrat e Jashtëm do të diskutojnë mënyrën më të mirë për të organizuar mbështetjen e NATO-s për Ukrainën, për ta bërë atë më të fuqishme, të parashikueshme dhe më të qëndrueshme”, tha një zyrtar i NATO-s, duke shtuar se diskutimet pritet të vazhdojnë në prag të samitit të korrikut.
Pjesa më e madhe e armatimit perëndimor që i jepet Ukrainës menaxhohet nga Grupi Ramstein i udhëhequr nga SHBA, i njohur zyrtarisht si Grupi i Kontaktit për Mbrojtjen e Ukrainës, i cili takohet rregullisht për të diskutuar mënyrën më të mirë për të bashkërenduar dërgesat dypalëshe.
Dy nga diplomatët paralajmëruan se propozimi do të kërkonte mbështetjen e të 32 anëtarëve dhe ka të ngjarë të ketë muaj negociatash përpara, në të cilat pjesë të propozimit mund të zvogëlohen.
