Moti i keq me reshje shiu dhe dëbore ka përfshirë dhe Qarkun e Lezhës. Sipas të dhënave zyrtare të Mbrojtjes Civile prej mbrëmjes të së djeshme Bashkitë Lezhë dhe Kurbin janë përfshirë nga reshjet e shiut me intensitet të lartë dhe mesatar, por fatmirësisht pa krijuar probleme.
Ndërsa Bashkia Mirditë është përfshire nga reshjet e dëborës, trashësia e së cilës arrin nga 5 deri në 25 cm në varësi të zonave.
Prezenca e dëborës ka krijuar vështirësi në lëvizjen e automjeteve në rrugën e kombit segmenti Fan-Tuneli i Thirrës si dhe në rrugët e brendshme të fshatrave të Njësive Administrative Fan, Orosh dhe Selitë. Po ashtu raportohet për mungesë të energjisë elektrike, në fshatrat Prosek, Trojez dhe Perlat Qender si dhe në Njësinë Administrative Rrëshen, fshati Gziq.
Moti i keq me erë të fortë ka sjellë probleme edhe në lundrimin detar në Shëngjin. Kapiteneria e Portit ka urdhëruar ndalimin e lundrimit të mjeteve të peshkimit, pasi dallgëzimi arrin deri në 5 ballë. Ky vendim do të jetë në fuqi deri në përmirësimin e kushteve atmosferike, ndërsa e gjitha situata e motit në tërësi po mbahen nën monitorim të vazhdueshëm nga sektori i Mbrojtjes Civile në të tre Bashkitë e Qarkut Lezhë.
